改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》(江南美人)，聽日就大結局，港劇迷可透過Viu追劇。

噚日《江南美人》播出第15集，雖然上演吻戲，但收視就比上周微跌至4.832%。承接上集林秀香同銀優正式拍拖，不過兩人就好低調，仲喺林秀香屋企約會，銀優從後攬住林秀香，銀優話：「咁樣攬住你，感覺真好。」兩人亦決定唔偷偷摸摸，公開戀人關係，點知返到學校冇人過問，最後老師問佢哋係唔係拍拖，銀優即二話不說承認自己同林秀香拍拖，大方指林秀香係佢女朋友。

銀優同林秀香換上校服約會，林秀香話自己從來冇為打籃球嘅男生打氣，銀優即提議依家就做畀佢睇。之後二人又去睇電影，點知因為着住校服就被大叔指佢哋細細個掛住拍拖，將來就考唔上好大學，激死銀優，林秀香仲即時起身教訓大叔。

二人睇完電影時間已經好晏，冇晒車搭，最後因為林秀香父母唔喺屋企家，兩人就返咗去女方屋企，銀優話想睇返林秀香以前個樣，仲想拎起舊相簿，林秀香趴到銀優身上想奪回相簿，林秀香問如果自己仲係以前嘅樣貌，銀優會唔會鍾意自己，銀優情深話：「你就是你，冇關係。」最後林秀香畀咗舊相銀優睇，銀優話掛住以前嘅林秀香，因為係同自己一樣孤獨嘅女生。林秀香又突然冇自信，奇怪點解銀優會鍾意自己，銀優即時以行動表明心意，突然咀林秀香，初吻終於登場。

精選韓流，喺晒《娛果》
http://fb.com/appledailyent