容祖兒噚晚喺facebook直播同男神古天樂開生日會嘅實況，鏡頭下見到吳君如、古巨基、傅明憲、林峯同啲幕後工作人員等。全場人士，尤其係揸機嘅祖兒同主角古天樂，好明顯都已經「貓貓哋」。

平日唔特別公開同男友劉浩龍嘅祖兒，噚晚興起，連男友都拍埋入鏡，好明顯見到平日（習慣性地）行埋一二邊嘅劉浩龍，發現自己上鏡，明顯有少少愕然，再對鏡頭揮手笑。其實劉浩龍未必真係想出鏡，只係疑似飲醉咗嘅祖兒唔小心影埋佢上鏡。

點解話祖兒醉咗？睇番條片中段左右，即係君如拎住杯紅酒猛話搵問「古太呢？古太呢？」嗰陣，好明顯君如已醉，揸機嘅祖兒都好似hang咗機咁，一時之間諗唔到祝古天樂咩好。等到另一個古仔(古巨基)應要求清唱完幾句《當年情》之後，古天樂意圖打完場拋出《少林足球》金句:「歡樂嘅時間過得特別快，又係時候講bye bye…」俾晒位祖兒cut live，半醉祖兒都諗住cut 㗎喇，仲問:「點delete 㗎…」點知按錯掣，反咗個鏡頭由自拍變拍林峯。林峯仲自信滿滿的爆咗句:「Live係冇得delete 㗎！」

至於噚晚另一焦點，就係片尾古天樂講生日願望，佢提到「我希望阿ViuTV個乞兒呢...」嗰一句，唔單止令到全場譁然，亦有網民聽到，之後留言問到底係講邊個。雖然古天樂係話「希望對方飛黃騰達」，但ViuTV公關部王小姐對佢呢個講法就表示：「冇回應」。

另外，有好多網民都留言祝古天樂生日快樂，亦有人祝佢早日搵到另一半，喺生日會上有人唱咗古天樂首經典作《男朋友》，有唔少網民留言話想聽埋《今期流行》，唔知下年祖兒再幫古天樂開生日會時，古天樂會唔會應網民所求開個金口呢？