興建添馬艦政府總部變成政治角力賽,政府為爭取議員支持,話將來新建樓面有兩成係地庫,以降低建築物高度。地庫是否環保?建築師學會會長/中大教授林雲峯不以為然,佢認為興建地庫,除咗成本高五至七成之外,亦達唔到環保目標。呢個世界真荒謬,起樓明明係好專業嘅,啲立法會議員之中,除咗劉秀成教授,邊一位係建築師呀?但最大聲嗰班人就係其他議員,劉教授好似冇聲出噃,他日新政府總部如果起到好似中央圖書館咁,該煨咯。
好多人唔識就充內行,但唔好以為行內人就係專家。呢日在皇朝會食飯,窗口對正添馬艦及填海區,亦望到西九龍。我哋從添馬艦,西九龍講到東九龍啟德機場之發展,物業Y話:「西九推倒重來,添馬艦拖拖拉拉,啟德機場唔知會唔會再曬多十年太陽!」左丁山話:「唔會啩,近日報道話政府已經鐵定喺啟德興建郵輪碼頭喎!」物業Y講:「唓,據我所知,整體規劃(masterplan)都未有,啟德將來點樣發展,如何配合沙中線,起唔起運動城,都未有人知,郵輪碼頭要等多幾多年先至會出現呀!」等吓好似無妨噃,香港特區政府與財團好識發展地產,地皮曬太陽愈耐,升值愈高,起碼大家都係咁諗,郵輪碼頭,邊個識呀?等多十零年咪一樣!