蔡一傑今日繼續宣傳新歌《流淚的怪獸》，佢o係新城接受訪問講到早前接受「愛人」伍詠薇節目《伍姑娘真識食》訪問，噚晚喺奇妙電視播出，傑仔指屋企收唔到奇妙電視，所以係靠伍姑娘喺社交平台轉播節目先睇到，承認跟伍姑娘太熟，所以真係無所不談，單單講番伍姑娘露背同佢拍MV時，由於兩人要胸貼胸拍攝，而伍姑娘惟有貼乳貼上陣，最後因為現場又熱，加上兩人大汗，拍畢時伍姑娘發覺乳貼移位，但由於傑仔全程望天，所以未有察覺。

《伍姑娘真識食》節目中佢首次分享感情生活，自爆入行以來有一位拍拖18年女友，到30幾歲時和平分手，蔡一傑喺電台訪問話：「對於一啲熟朋友就講咗出嚟，都係好耐之前嘅事，係圈外人，之後就一路單身。」蔡一傑自言係怕醜仔一名，叫人唔好俾佢平日喺舞台上自信呃到，或者係咁先令到佢多年來都冇人追或示愛，佢形容自己感情生活係連曱甴都冇隻行過，傑仔話：「我好簡單，只要佢係獨立，思想獨立，大家鍾意工作同去旅行，彼此溝通到就得。」傑仔話當初因為同女友拍拖太耐，覺得唔結婚就係分手，兩人有共識下分開，如今佢對婚姻睇法已經有別於當年，問到會唔會介意多年來感情生活經常被指跟同性有關？佢話：「以前會介意，又關我事？唯有唔講，唔想越描越黑。」