人氣韓劇《雲畫的月光》令到男女主角朴寶劍同金裕貞人氣急升，當中朴寶劍先後被劇中演員大讚零缺點，而粉絲亦愛暱稱朴寶劍做「聖光寶劍」，讚佢為人善良，係學習榜樣。

喺前日播出嘅綜藝節目《黃金漁場》中飾演朴寶劍貼身侍衛張內官嘅李準赫已激讚朴寶劍零缺點(相關連結： http://bit.ly/2df8svF )，今次就輪到飾演佢胞妹明恩公主嘅鄭慧星對朴寶劍讚不絕口，鄭慧星喺噚日播出嘅綜藝節目《Happy Together3》亦都讚爆朴寶劍，佢話：「雖然我係大過朴寶劍幾歲，但係因為喺劇中我要化特殊化妝，所以佢對我好照顧。佢真係好可愛，仲會幫我吹風扇，即使係喺好辛苦嘅情況下，朴寶劍依然非常開朗，長得又帥又正直，而且仲好性感。」

鄭慧星話由於拍攝時天氣好炎熱，朴寶劍就會主動畀嘢食同埋水佢飲，十分善良。鄭慧星仲搞笑話：「因為沉浸喺角色中，所以佢一次都冇叫過我做姐姐。」

另外，雖然《雲畫》咁受歡迎，但劇組人士今日就話唔會延長集數，並鐵定以18集完結，即係下月18日播出結局。