由ARON、JR、REN、旼泫及白虎組成嘅韓國五人男子組合NU'EST出道已經五年，不過佢哋人氣唔算好勁，係直到四位成員分別參加人氣選秀節目《PRODUCE 101》，令到佢哋人氣急升，當中成員旼泫成功出線，成為限定男團Wanna One嘅成員之一，喺年半內旼泫將會暫停NU’EST嘅活動，四人嘅NU’EST就組成小分隊NU’EST W繼續活動。

而因為節目帶挈令到NU’EST W人氣爆燈，被封為「逆行奇蹟」，上月底喺韓國舉行兩場粉絲見面會，1萬張飛3分鐘就賣晒。今日佢哋就宣佈將於11月18號再度襲港，並於九龍灣國際展貿中心Star Hall舉行由德碩文化傳播有限公司主辦嘅演唱會。而為了答謝粉絲，NU’EST W亦推出《Hello》一曲嘅2017年版本，同時以新曲《If You》回歸樂壇。

除咗香港外，NU’EST W亦會於下月29號喺台灣舉開騷，門票今日公開發售，根據台灣傳媒報道，近3千張門票兩分鐘內就被搶購一空。