趙薇同黃曉明呢對內地明星，論緋聞之多足以稱帝封后，巧妙嘅係趙薇同黃曉明都傳過緋聞。日前呢對過氣緋聞情人出席北京舉行嘅明星慈善夜，當晚趙薇同陳坤拖手入場，眉來眼去，黃曉明就唔騷趙薇，改黐章子怡，但原來喺慈善夜舉行前幾日，趙薇同黃曉明竟然約埋唱K玩通宵，真係神奇之至。
當日早上11點，啱啱瞓醒覺嘅趙薇一頭亂髮，戴住太陽鏡遮掩素顏，身穿紅裙由朝陽區公寓出發，去一個名為朝內頭條嘅地區影相，到晚上7點幾一面濃妝嘅趙薇收工，坐車去火鍋店開餐。嘆足三粒鐘之後，趙薇又坐車去雍和宮附近嘅錢櫃KTV唱歌，佢落車時仲笑得非常開心，表現興奮。

繼而趙薇行去卡拉OK內嘅VIP大房，原來黃曉明已一早在場等候，一見趙薇仲即刻企起身熱情擁抱。諗唔到趙薇當日咁早起身仲咁好精力，同黃曉明唱足六粒鐘，到凌晨4點趙薇同助手先離開，助手仲捧住一大束鮮花，唔知係邊位有心人送畀趙薇㗎呢？相隔20分鐘，飲到醉醺醺嘅黃曉明由司機攙扶走人，黃曉明滿面通紅，腳步浮浮，相信佢同趙薇都應該玩得好盡興。
雖然黃、趙兩人其後喺明星慈善夜時表現避忌，但有內地傳媒話嗰晚見過趙薇同黃曉明挽住臂彎，兩人關係可謂像霧又像花。不過黃曉明初出道時，公開講過自己有段時間好鍾意趙薇，覺得佢似格林童話中嘅公主。有傳二人早年拍過拖，但因趙薇鍾意咗陳坤而告終，所以呢期趙薇翻撻黃曉明亦都唔出奇。