早於今年一月，容祖兒出席一個活動時，講到喺日本俾人撩，所以佢會好小心，唔會立亂同陌生人傾偈，當時有傳媒問佢係咪驚劉浩龍擔心？唔知點解祖兒忽然好避忌咁話：「唔好講呢啲。」然後將個話題扯番去自爆喺日本黑麻麻踩單車，好驚驚咁話。

當時傳媒再追問祖兒有冇將日本之旅經歷同男友講？佢話：「冇呀，唔需要日日搵啦，獨自遊就係唔想交代咁多嘢。」外間就開始猜測…咦，係咪散咗？今晚容祖兒會喺中環出席活動，將會一次過交代晒所有有關分手嘅事。

事有湊巧，劉浩龍下月27號麥花臣開一場演唱會……分手傳聞似乎嚟得啱啱好。但亦有傳兩人係真分手，原因係有人棒打鴛鴦。

睇番歷史，2012年6月兩人宣佈戀情之初，祖兒伯樂、英皇老闆楊受成就開腔，不但沒送祝福，仲嘲師兄過早張揚戀事係笨拙，而且魯莽：「如果佢（指劉浩龍）珍惜，開始階段唔應咁早講，我覺得有少少魯莽。」

當日楊受成一番語重心詳之言，重點係——暗示有人暗藏機心。當時傳媒問佢係咪贊成祖兒拍拖？楊受成最初稱：「佢鍾意我就鍾意。」又話：「最緊要祖兒開唔開心。對方係咪真心鍾意佢，我哋都開心，錫佢嘅人開心，佢啲歌迷都開心，希望對方錫佢係冇其他目的。」同一個訪問，楊受成再次強調「目的」二字：「我哋希望佢開心，搵到佢鍾意嘅嘢，對方真心愛佢，唔係有其他目的。」

似乎係好擔心祖兒？楊受成當時話：「我哋咁錫佢，梗係擔心佢，希望祖兒揀到佢真正伴侶，錫佢嘅人。」但強調「感情唔係分等級同財富，唔好用呢啲嘢比較。」楊受成當時亦直言唔識劉浩龍，又指自己冇資格評點。

精選娛聞，喺晒《娛果》
http://fb.com/appledailyent