當年今日
關於我們

公關何必考牌 - 左丁山

蘋果日報 2006/09/24 00:00


公關行業據說甚為好景,一位「公共關係專業人員協會會長」崔綺雲對記者講,公關公司不斷擴充,加上企業愈來愈重視形象,挖角潮湧現,一啲政治公關人才嘅年薪可達一百萬元。
公關行業是否真係咁好景,左丁山有啲懷疑。呢一行,最易被炒魷魚,因為公關乃係錦上添花嘅工作,公司有錢、有生意,睇到前景,就肯花錢請公關人員,做公關工夫,希望為公司帶來更多生意;又或者公司碰上形象危機,受盡批評,於是急急請公關度計補救。只有一啲巨型公司機構,先至會常年設立公關體系,視之為公司品牌建設之整體部份,不可或無。
但即使係咁,碰上經濟不景氣,由美國到歐洲,莫講中型公司,就算係跨國企業,第一波裁減嘅清單之中,梗係後勤人員、公關人員、咖啡奶茶訂報費等等。到經濟好景,要等到最後先至會請番公關人員。呢個循環,歷久不變。
政治公關喎,喺香港屬半搞笑,因為高官唔會俾甚麼政治公關游說(大老闆私人搵高官傾吓就得),議員對眼只會望住選民嘅選票,政治公關請佢哋食飯、解釋、提供資料之時,議員就幾合作,話公司有道理可以同情。出到嚟,一俾傳媒訪問,變臉就快咯,立即會話為咗公眾利益,公司必定要向市民交代,要盡社會責任,食飯時候所講嘅說話,已經唔記得晒。試問政治公關點向公司交代?老實講,如果風平浪靜,傳媒唔批評嘅時候,請位政治公關年薪過百萬,份工邊會做得長呀?
公關唔係律師、工程師、會計師、醫生咁樣,做事手法與辦事技術,會有規可循,考試攞牌有依據。做公關講究手法靈活,隨機應變,最好天文地理政治經濟科技全部識齊,兼且識埋全港記者編輯及所有重要人物。呢啲邊度可以考試㗎?考邊科呢?崔綺雲話內地與新加坡都有考牌制,香港可效法新加坡。呢兩處都係以考牌為手段,限制一啲思想過於靈活(公關人員必須)嘅行業,香港學嚟做乜?所有考牌活動,以經濟學概念嚟講,都係限制進入(entrybarrier),屬保護主義,公關行業更應該反對!