咩叫將自己嘅快樂，建築喺人哋嘅痛苦之上呢？阿根廷國家隊隊長美斯早前喺美洲盃決賽射失12碼，搞到阿根廷再一次輸畀智利之餘，呢位巴塞隆拿前鋒賽後亦都話會退出國家隊，不過美斯嘅痛苦，隨時令到一位球迷發達喎！

話說一位叫華斯基斯嘅智利球迷，喺決賽之後成功將美斯「打飛機」嘅波偷運咗出球場，佢依家就打算將個波拎出嚟拍賣，西班牙《馬卡報》報道，華斯基斯已經拒絕咗幾次嘅出價，最高嘅出價更加去到27,000歐元（約230,000港元），但佢就希望等個價再高啲先放賣。