余香凝、廖子妤、谷祖琳、岑珈其主演電影《非同凡響》票房衝破五百萬，一眾台前幕後同受惠機構，噚晚喺北角參與慶功宴，故事講述特殊學校學童生活，現場有媽媽現身分享。

余香凝喺元朗謝票後趕出來匯合大隊，佢話：「連日謝票謝出一個道理，無論個人幾謝都要謝票，攰都值得，每次都聽到感動說話。」岑珈其話戲中演員各人都謝票有一百場，余香凝話因謝票而同觀眾走近，知道有一對兄弟入場睇戲超過十次，生日又包場請朋友睇，另外有殘障人士入場支持，兩人話未來仲有好多包場場次，暫時知道去到2019年5月，希望票房可以過千萬做善事。至於會唔會有第二集？余香凝話：「我都想，好睇觀眾，呢個成績算係有交代，應該得嘅。」

谷祖琳有包場請朋友睇戲，自己睇咗五次都黯然落淚，有次帶同一對女兒入場，佢話：「 佢哋由頭睇到尾，返到屋企仲問我點解啲小朋友控制唔到自己，原來佢哋係會諗，我就教番佢哋正確態度，睇完套電影佢哋乖咗，珍惜自己擁有。」

谷祖琳有份參與節目《女人四十》，反應好好，佢話：「搵我拍時都唔記得已經四十歲，廿九到三十歲就好介意，過咗三十就冇再計，最緊要心態唔似四十，已經過咗要爭同贏嘅年紀，個人反而輕鬆咗，年輕咗。」

精選娛聞，喺晒《娛果》
http://fb.com/appledailyent