現年37歲嘅韓劇《巴黎戀人》男星李東健，今年5月同劇集《月桂樹西裝店的紳士們》嘅34歲拍檔趙胤熙奉子成婚。

噚日二人被爆喺首爾鐘路區三成洞附近低調舉行婚禮，事務所又指因趙胤熙現時懷孕，所以佢哋唔會度蜜月。

而今日呢對新人就公開噚日婚禮嘅照片，當中兩人分別着上西式及韓式婚服，趙胤熙不時將花束遮住腹部，所以唔多見肚。

另外，今日韓劇《守望者》女星李詩英會同拍拖1年嘅圈外男友奉子成婚，李詩英噚日已率先公開甜蜜婚照。而同李光洙、趙寅成、宋仲基等人老友鬼鬼嘅36歲男星金基邦，今日亦會迎娶圈外女友。