顏卓靈、鄧小巧同黎曉陽今日喺工展會出席「閃耀工展‧家傳戶曉頌經典」，聽日係顏卓靈24歲生日，佢話早已同公司請假慶祝，男友白只點同佢過生日﹖顏卓靈話：「未諗定，但夜晚會同屋企人、大學同學喺屋企打邊爐，每年都係慶祝聖誕、生日同新年。」白只已經融入家中﹖佢笑住話：「係呀，我已經邀請咗我啲朋友，但佢又邀請多一次，好似有啲嘢做吓咁囉！」

顏卓靈透露收到一個即棄菲林相機，至於白只嗰份禮物呢﹖佢就話：「未呀，我通常叫屋企人、朋友唔使送禮物，總之每年都要齊人，嚟到屋企幫我清咗倉庫嘅衫褲鞋襪、護膚品，因為真係好多，我用唔晒。」顏卓靈表示明年要喺電影同音樂兩方面做番平衡，所以會比較忙，佢話：「年頭要去馬來西亞，年中或者年尾要去台灣。」分隔兩地，怕唔怕影響感情﹖佢指：「唔怕，馬來西亞、台灣離香港都好近，佢得閒就嚟囉！」

至於鄧小巧覺得今年聖誕節氣氛唔夠濃厚，不過噚日已經同朋友食辣雞煲過聖誕，仲有乘機偷懶冇做運動。佢自爆被屋企隻貓貓抓傷腳板底：「佢嚇親逃走嘅時候，借我隻腳發力，傷口唔太深，但行路要用力，o依家有少少發炎。隻貓成日都嚇親，圍村入面有人燒炮仗，佢就好驚。」佢又透露23號晚，同一班歌手朋友慶祝，每人帶一枝酒，有冇飲醉﹖鄧小巧話：「我冇飲醉，冇乜狂歡，因為有工作。」

更多娛聞，喺晒《娛果》
http://fb.com/appledailyent