一般來說，韓星除咗拍劇、拍電影、出碟、巡演，仲會靠廣告代言吸金。近日網上有一篇文章指今年嘅韓國廣告界版圖發生變化，除咗女神全智賢及「國民初戀」秀智依然Keep住受廣告商歡迎之外，其他女星亦漸漸累積人氣，陸續收到廣告邀請，包括去年賣座韓片《屍殺列車》女星鄭有美以及神劇《太陽的後裔》女星金智媛。

文章指全智賢就算結婚、誕B復出後，依然受廣告商歡迎，甚至因為升呢做媽咪後令其廣告女王地位更加穩固。文章又指就算女神目前正懷第二胎，手上依然有10個以上嘅廣告合約，係女演員中較為罕見嘅情況；至於被稱為「100億韓圜少女」嘅秀智，就算忙於拍劇、出碟，亦一直有唔少代言活動，人氣可謂居高不下。

另外，女團AOA人氣成員雪炫因組合活動累積嘅健康形象，亦獲得廣告商嘅青睞，文章指雪炫目前約有11個代言喺手，而新一代韓劇「收視福將」徐玄振憑《又，吳海英》、《浪漫醫生金實福》人氣急升，由於佢演技好，加上毫不造作嘅性格，曾獲「適合拍攝任何廣告」嘅評價。