立法會選舉提名期7月16日開始，各大門派都已經準備就緒。嗱，之前因為組黨脫腳，一直都未講實到底係唔係喺新界東參選嘅上水鄉委會主席侯志強，近來動作多多噃，除咗頻頻落區送福袋等「例牌菜」，仲趕上潮流發動網戰喎。

八方發現，日前出現咗一個以佢名字開嘅Facebook專頁，但po嘅文唔多，得嗰兩張相，所以呃like方面成績麻麻，暫亦唔知係惡搞定係真‧侯強。

而對唔少花生友嚟講，睇專頁嘅一大發現係，乜侯志強英文名原來係Gary？但有心水清人士卻發現，侯志強之前好似叫Bowie㗎喎，莫非最近改咗名？又唔通，佢見到新東兩名現任議員民建聯陳克勤同新同盟范國威都叫Gary，覺得好意頭，所以用埋一份？

八方打過電畀話畀鄉事派Gary，但佢未覆，所以未能解開改名之謎。