考第四都要喊,係咪心理有問題?志雲大師膽粗粗問咗句。林鄭笑言「可能有啲」,又話當年中學選科,覺得叻人要讀理科做醫生,後來會考理科科目考得麻麻,反而歷史、英國文學就有好成績,所以到預科就轉讀文科,做唔成醫生變咗今日好打得嘅「局長奶媽」。
林鄭話一開始冇諗過考到政務官,皆因佢喺港英年代有兩大「污點」:大學年代活躍於社運,又組織香港大學學生去北京清華大學交流,「我係副團長,李永達同單仲偕都係我團員」。佢明言當時對社會問題感到不安及不滿,但選擇喺建制內改變。做唔做到呢?佢話:「如果我唔覺得做到,我唔會留到今日。」
李八方
mailto:
[email protected]