唐牛唔識時裝，不過唐太就係高手，講開思捷（330）業績衰到冇朋友，佢就從消費者嘅角度，講咗個死因出嚟。「Esprit嘅衫，讀中學嗰陣（講緊90年代）就係奢侈品，家真係好難買得落手囉，冇款之餘仲要貴。ZARA就唔同啦，夠晒時尚氣息，價錢中上，但質地好，抵番晒；H&M質地麻麻，但勝在價錢平，任何『士Die佬』嘅女人都殺；UNIQLO夠Basic，價錢大眾化。」
唐太仲話，陽光品牌Hollister、AmericanEagleOutfitters已經相繼落戶尖沙嘴，GAP中環旗艦店裝修亦進入倒數階段，加埋嘜定銅鑼灣京華中心嘅Forever21，Esprit唔痛定思痛，肯定好快喺香港消失。
經過一輪洗腦教育，終於明白女人眼中思捷嘅不足，其實要將盤生意搞番好來來去去都係嗰三幾招──玩Crossover、玩限量、玩包裝。至於思捷嘅第一步，應該係要放棄悶得令人發慌嘅裝修！
唐牛