神隱14年嘅娃娃舜（黃宏舜），今日聯同雨僑及導演胡耀輝，喺新蒲崗出席《猛龍特囧》香港網絡男神選舉活動，共有十名參賽者入圍，不過今次得九人出席，佢哋接受化妝師及雨僑教化妝技巧，另外，喺現場玩遊戲，其中一個係娃娃舜同胡耀輝蒙住眼，幫參賽者化妝，點知畫到佢哋花面貓。

講番今日個「娃娃look」，身形暴脹嘅阿舜束起金髮，有一執頭髮仲highlight紫色，見佢化妝兼畫埋眉，眼肚位置畫咗疑似血痕嘅眼妝，而娃娃舜玩遊戲時都幾投入，並應記者要求扭咗幾下娃娃舞。

之後娃娃舜首次接受傳媒訪問，不過佢表現幾cool，回答時都係一句起兩句止。

講到日前喺荔園表演OK，被網民讚賞，問佢覺得點？娃娃舜表示：「開心囉﹗（信心大咗？）信心一向都有。（研究舞步好多年？）幾年。（好犀利？）我學習能力高。」

之前佢喺facebook寫住蓄勢待發，係咪想入娛樂圈？佢起初冇正面答：「畀啲信心自己，（入娛樂圈？）考慮下啦。（拍戲定唱歌？）鍾意唱歌，唱歌跳舞兩樣嘢一齊，快慢都冇問題。」

講到身形比起14年前肥咗？佢話冇磅過。問到有乜嘢原因搞到咁肥？佢話：「可能結咗婚，我工作上需要有咁嘅身形，（乜嘢工作？）體力勞動。（運輸工作？）之類。」

另外，娃娃舜就嚟做「爸爸舜」，佢話：「係呀，（BB）就嚟出世，今次係第一個。（仔定女？）未知，個肚七個月，因為冇照過。」惟問到結婚問題時，好似結咗婚幾耐？佢就唔想講。咁結咗婚未？佢就話結咗。