徐天佑今日到商台宣傳新歌《我們沒有不期而遇》，佢話新專輯籌備3年，終於會喺今年暑假期間推出。講番新歌MV，佢話係舊年12月同老婆去冰島旅行時順便拍埋，佢話：「本身諗住真係同老婆去玩，但後來決定拍MV，於是帶齊架生去拍，兩個星期行程日日拍，老婆有幫手揸機同個背脊出鏡。」

明明去旅行，但變咗做嘢，老婆有冇投訴？天佑話：「咁又冇，不過遇着天氣唔好嘅時間佢就唔落車，叫我哋自己拍。」天佑又話條片拍得好靚，當老婆睇到MV完成品後，都覺得辛苦係值得。

天佑稱為咗補數，上月就同老婆去咗荷蘭同瑞士旅行：「今次就真係玩，冇拍嘢啦。」佢仲提到早前有班從荷蘭返港嘅客機遇氣流令乘客受傷嘅新聞：「原本我哋就係坐嗰班機，但後來決定喺荷蘭留多幾日，先冇搭到，好彩冇發生重大受傷。」