當年今日
關於我們

【逆權運動】8.31被捕一度無知覺誤傳死訊 同路人證抗爭者仍生還

蘋果日報 2019/09/04 09:58

死訊逃犯條例逆權運動

在最壞的時候,總需要有好消息。網上盛傳8.31於太子站月台被速龍警員按倒地上施襲、懷疑失去知覺的男子已經死亡,但有當晚同樣於太子站被捕人士向《蘋果》表示,在警署扣查時曾與該男子傾談,其間有講有笑,無見到有明顯傷痕,從側面證明該男子仍然在生。
警方公佈8.31太子站內共拘捕63人,阿俊(化名)是其中之一。他指當時有大量防暴及速龍警員衝到月台,自己被多名警員撲倒並拘捕,僅輕微擦損,卻親眼見證身邊其他人被打至頭破血流,「啲防暴見到人就拎住支棍係咁毆」。他憶述警員施襲時間大約為晚上10時45分,但直至約凌晨12時30後始被正式通知遭到拘捕,再安排登上往荃灣方向列車,「同一架車有幾個都受傷,有瞓擔架嘅,有坐輪椅嘅」,到荔枝角站後由白車分送不同醫院。
阿俊到醫院經簡單檢查後,未有驗傷即被警員帶走,被安置在葵涌警署停車場內,「佢哋下分咗幾個區,錄口供、影相、刑事調查等候區咁,有6、7排凳,一排6至8個,坐滿晒,都應該有50幾人」,當中就有《蘋果》當日直播影片中被兩名速龍警員按倒在地上、再用警棍攻擊的男子,「出番嚟先知網上話佢死咗,嗰晚有同佢傾過幾句,平安嘅,行得走得,唔覺有咩明顯傷,仲有講有笑。」但他未有留意該男子幾時離開警署,「係保釋定送去第二度真係唔知。」而《蘋果》翻查照片庫,亦發現一名被鎖上手扣的男子,其衣着與網上流傳的照片相同,較早前亦拍得該名男子於相同位置被身穿黑衣的疑似速龍小隊制服。
阿俊稱被扣押時雖無遭「郁手郁腳」,但所有人均飽受警員言語侮辱,「話咩曱甴啊、咩捉極都捉唔晒啊」,又被要求戴上隨身背包內的裝備拍照,甚至多番被人威脅,試圖在律師到場前完成錄口供程序,「暗示話你唔合作就會對你不利,會捉你入房,又話畀你『試吓新嘢』。」他堅持不肯就範,警員於是以不同藉口拖延七小時方安排他見律師,最終在被捕後44小時保釋離開。
走出警署不代表可以鬆一口氣,阿俊表示現時一閉起眼,耳邊就彷彿響起當晚太子站的緊急事故警報聲,以及身邊人被警察襲擊時發出的慘叫聲,「完全瞓唔到」。他認為警方的行動猶如7.21元朗鄉黑在西鐵站及車廂無差別襲擊途人,「除咗無恥真係唔知再點形容佢哋」,日後亦不會再乘坐港鐵。
-----------------------------
美國民主與人權法案集會
日期:9月8日(星期日)
時間:下午2時
地點:美國駐港澳總領事館
主辦:民間發起
-----------------------------
【撐學生】
召集有心人 撐學生全年睇《蘋果》
立即按此
empty
該名男示威者被壓倒在地上,一度無知覺。