早前香港01舉辦「經濟高峯論壇」以活動屬私人閉門形式為由，唔畀包括《蘋果》在內嘅行家採訪，今次就到「清華大學國家戰略研究院」、「紫荊雜誌社」和「香港新活力青年智庫」合辦嘅「一國兩制與基本法研討會」唔畀大部份記者入場，但就以「嘉賓」名義，畀《文匯報》、《大公報》同中央台去「採訪」。

《文匯》《大公》變上賓

《蘋果》噚日一早同香港多間主流傳媒到場，主辦單位以場地有限為由，話不設採訪；但《蘋果》記者問點解《文匯》、《大公》可以入去，對方就話邀請咗上述傳媒派人以「嘉賓」身份出席，但話唔係「採訪」，不過八方所見，有持中央電視台咪牌嘅記者，喺會場自出自入，咦！有人會帶住個咪牌行出行入做「嘉賓」？

講返個活動，當然又唔少得建制有份量人物，好似基本法委員會副主任譚惠珠、清華大學國家治理研究院院長、港澳研究中心主任王振民，但原來一班喺區選落敗嘅建制派人士都有份，好似經民聯丁煌、陳財喜、新民黨甘文鋒等，唔知當日請佢哋時係咪已知佢哋落選？定係以為佢哋贏硬所以請定先？