報紙上久唔久就見到一啲教授發表文章評論大學教育，每指責：「大學教員爭取在頂尖學術期刊發表論文，相對把教學放在次要地位，是否符合本港發展的需求。」呢類言論，不同教授不時在報章翻炒又翻炒，講一千次，就有不少人信以為真，誤解大學教授只顧研究，不理會教書，讓學生自生自滅。十幾年前，左丁山有幸與一位耶魯大學著名女教授（香港人）傾過研究與教學嘅問題，女教授話：「不研究，邊度有新知識，教書就只能吃老本，或複述其他權威著作，久而久之就會落後晒！」左丁山之大學老師，有一位以發黃、源自大陸民國時期嘅講義嚟教我地，同學都在背後取笑佢。
得閒在報章發表長篇大論的教授們，近年曾否有學術著作在學術期刊發表過？左丁山唔知，亦冇查過，心水清者不妨上大學網站查吓。大學教育資助委員會於九月八日頒發歷史上第一次全港大學傑出教師獎，在各大學提名之十六名優教大學教師之中，選出兩位得獎人，一女一男，一港一加拿大人，一中大一港大。遴選委員會主席WilliamKirby（哈佛大學中國研究及商業管理教授）稱讚兩人之教學熱誠與教學方法不可多得，另一位遴選委員BrianCoppola教授曾獲「2009年美國年度傑出教授獎」，係密芝根大學化學系教授，認為獲提名之十六位教授之教學工作達世界級。

獲獎女教授潘偉賢於一九八三年中大畢業，主修數學，副修統計與經濟，一九八七年得UCLA生物統計學博士，副修心理學，現為中文大學理學院副院長（教育）。潘教授自一九八五年至二○一一年，與同行合共發表七十篇論文，二○一一年已有兩篇，可見得佢非常着重研究，但今次獲得「傑出教師獎」噃，就真係叻到極，令一啲成日話：「掛住研究，忘記學生」嘅人士汗顏。男得獎者就係香港大學法律學院副教授郭力祺RichardAGlofcheski（波蘭裔），劍橋大學法律碩士、加拿大執業律師，在港大執教20年，著有TortLawinHongKong一書。