抗暴之戰成為唔少港人生活之日常，每次抗爭都有撐警或者紅色商戶成為抗爭者「裝修」目標，但建制大黨民建聯似乎驚呢啲商戶唔夠認證，喺fb出帖發起「齊消費 撐商店 #SupportHKChallenge」行動，呼籲支持者一連三日幫襯，仲叫人將收據或者打卡相放上fb，再點三個朋友延續行動，率先被點名就有李慧琼、張國鈞及陳克勤。

連登仔：「大裝修」認證

呢批被「點名」商戶有美心、東海堂、富臨、元氣、吉野家、中移動、優品360同Starbucks，李慧琼同陳克勤噚日煞有介事同班黨友職員齊齊拎住杯Starbucks咖啡影相，陳克勤仲上載埋張單，盛惠532蚊，原來係佢負責找數。

講到找數大家當然想食窮民建聯，網上就出現文宣圖，見到禮義廉個玩法升級咗，變成「你消費 我找數」，仲叫人將收據交去附近民記辦事處，佢哋就會找數，商店名單改埋蘋果同COACH呢啲名店。八方心水清，呢啲舖頭都冇被破壞，睇真啲就知係改圖，呼籲大家咪上當，因為禮義廉唔會認數㗎。不過亦有連登仔話民記咁做，因為佢哋咁搞等同公開認證呢批商戶「藍到冇得再藍」，萬一呢啲商戶之後再俾人加碼「大裝修」，民記嘅認證應記一功，各商戶記得搵民記找數。

李八方