谷祖琳(小谷)、李思欣同范振鋒夫婦、魔術師小齊等，今日去到將軍澳出席慈善魔法表演騷活動。小谷懷孕6個月，但身型十分纖瘦，幾乎睇唔出佢陀住BB，不過佢就明顯一臉倦意，小谷話：「開始覺得攰，不過都會繼續落甜品鋪幫手，因為做飲食業冇得休息，上次生囡囡之前一日都仲落緊鋪頭幫手。」小谷除咗忙於湊女同打理生意之外，仲要兼顧思覺失調基金慈善活動，真係百足咁多爪。

小谷同魔術師小齊係好朋友，佢就希望大女將來同小齊學魔術：「佢好有表演天份，又唱歌又跳舞，我自己都好鍾意睇魔法表演，人唔入行冇所謂。」佢又話囡囡將來知道妹妹即將出世，好彩冇呷醋。