季軍VS冠軍丨余少寶移居德州享受生活樂趣 重遇楊寶玲勁讚：仲係白白淨
蘋果日報 2021/03/24 19:27
余少寶楊寶玲香港小姐
1993年港姐季軍余少寶移居美國德州多年，1987年港姐冠軍楊寶玲就住在拉斯維加斯，前日楊寶玲和外籍老公到德州探望余少寶，兩位港姐級人馬喜相逢，余少寶將合照貼上社交網，網民都讚53歲楊寶玲和48歲余少寶保養得宜。
余少寶接受《蘋果》電話訪問表示，「我哋都有10年以上無見，有一次我跟明星足球隊出埠，在機場遇到，影咗張相傾咗兩句，佢同佢先生嚟德州參與一個慈善單車活動，撞啱喺我住嘅城市。當佢哋嚟到我屋企嘅時候，我好開心見到佢哋，大家都忘記咗疫情，照擁抱，因為好難得喺呢度見到香港嘅好朋友。」
對於網民讚兩人駐顏有術，尤其楊寶玲皮膚依然白滑，余少寶都讚：「係呀，佢身材樣貌同以前一樣冇變過，佢長住拉斯維加斯，但佢曬極都唔黑，仲係白白淨。」楊寶玲曾經歷兩段失敗婚姻，2015年梅開三度嫁給英國籍初戀情人Gavin，組成幸福家庭；而余少寶同樣經歷失敗婚姻，2012年與前夫關兆輝結束8年婚姻。
移居德州多年的余少寶說：「我住喺德州呢度，做花園鋪路甚至起墻都要自己嚟，所以而家都無keep 啦！不過，都係一種樂趣。喺呢度乜都要靠自己，比以前喺香港生活冇咁嘆，因為喺香港家頭細務都有人照顧，呢度要自己嚟，自己煮餸、清潔、洗碗，但都係一種樂趣，以前喺香港好多嘢都唔識，而家好感恩學到新嘢，幾好吖。」
余少寶在美國德州居住，花園鋪路、起牆都自己搞掂。（受訪者提供）
楊寶玲當年選港姐時是大熱門（資料圖片）
余少寶在德州生活一腳踢，感恩學識好多嘢。（受訪者提供）
余少寶是1993年港姐季軍，冠軍是莫可欣。（資料圖片）
兩位港姐級人馬駐顏有術（受訪者提供）
1987年度港姐三甲都是靚女，冠軍楊寶玲、亞軍李美鳳、季軍林穎嫺。（資料圖片）
楊寶玲於2015年嫁給英國籍初戀情人（網上圖片）
余少寶和楊寶玲冇見十多年，開心重逢。（受訪者提供）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！