今屆立法會議員宣誓，青年新政梁頌恆同游蕙禎、香港眾志羅冠聰宣誓玩口音喺誓詞加料，結果引嚟港府同建制派大鬧，成班建制派議員忽然成為正音專家，拎住班本土議員讀誓詞口音造文章。但最諷刺嘅係，其中一個批評羅冠聰讀音唔正嘅議員，竟然係當年將try my best讀成「搓my breast」、俾人笑到𠵱家嘅民建聯陳克勤！但佢即刻俾其他議員寸，話佢宣誓時一樣好多字讀音唔正，認真冇面！
話說噚日開內會，成班建制派議員係咁鬧梁頌恆同游蕙禎嘅誓詞加料係「辱華」，要求兩人先道歉同收回言論。呢個時候陳克勤梗係唔執輸加入，但係佢就將矛頭指向已獲立法會秘書長陳維安確認宣誓有效嘅羅冠聰，話佢宣誓時將中國個國字讀歪音，應該宣誓無效，要重新宣誓喎！