呢日打吡日用A欄作賽，外檔馬大利，跑到第八場為止，有六win來自呢類馬，當中包括第八場三班1400米，由韋達大熱掄元2.6倍之「英才」，此駒一如廐侶第六場「正大光明」，跑季軍後再出贏馬補中，容天鵬起用兩大高手潘頓同韋達，順利炮製出一口馬房大熱孖寶。
「英才」對上兩場都搏失跑二、三名，今勻排12檔，韋達落足心機炮製，留到最後百幾米，吼準雷神騎次熱門「飛來猛」同「川河首駒」鬥到咁上下之際，從大外欄全力催策「英才」上前，及時追過兩駒率先衝線，13屆冠軍騎師復蘇連續兩個賽日有馬贏，「英才」亦告重響勝鼓，取得今季第二捷，三歲拍賣馬服役八戰入晒前四名。
相反「飛來猛」影相飲恨做阿二，惟此駒同「英才」一樣，出道以來未甩過前四名，三、四名分別係「川河首駒」同「神聖火炬」。