男子組合BOP（天堂鳥）今日喺深水埗舉行簽唱會，三位成員Gordon（葉灝基）、Lincoln（許俊豪）同Tyrese（歐鎮源）除咗幫粉絲簽名，佢哋仲現場唱歌同玩遊戲外，仲自製咗新歌《Take Me Higher》嘅單曲碟送畀粉絲，但就只有頭50位先有得攞，佢哋話：「都有叫佢哋早啲排隊，因為真係得50隻，我哋屋企人都冇，不過25號會喺廣州搞一場簽唱會，如果真係想要就到時麻煩佢哋遠啲過去。」

天堂鳥話已經有2、3年冇開簽唱會，有啲緊張，呢次係想warm up吓，因為嚟緊10月佢哋會開一個小型音樂會，佢哋話：「我哋收到好消息，有人邀請我哋開迷你音樂會，對我哋嚟講係打咗支強心針，我哋再唔止得5首歌，o依家有15首歌，都夠嘅，希望自己可以擔晒唔使請嘉賓，我哋要做得好好睇睇，得一場已經好開心。」講到會唔會擔心賣飛情況？佢哋就話因為細場，都好有信心！