今個1月冬季轉會市場淡靜咗30日，但關閉日就有好多轉會消息同傳聞滿天飛，其中英超球隊昆士柏流浪（QPR）新帥曉士就盡最後努力，希望可以令法國前鋒施斯重返英超，令QPR喺1月嘅新兵暫增至5件。

曉士擴軍已添4新兵

受全球經濟環境差影響，1月轉會球員唔算好多，天價轉會更加冇，睇嚟再冇「HeyBigSpender！」呢支歌仔唱。正因為咁，QPR班主費南迪斯講得出、做得到，真係攞咗2,500萬鎊（約3.1億港元）畀新帥曉士擴軍，都算係咁。繼借用曼聯前鋒馬捷達、AC米蘭後衞泰禾同南錫防中森巴迪亞基迪，兼買埋曼城後衞奧奴夏後，拉素嘅法國前鋒施斯都好大可能加盟。
據報，QPR同前利物浦及新特蘭前鋒施斯已經傾掂個人條件，因為佢目前喺拉素根本唔受重用，好想快啲鬆人；但拉素同施斯都想QPR用400萬鎊買斷佢，而唔係先借後買。究竟施斯可唔可以重返英超，就取決於QPR夠唔夠牙力；因為2,500萬鎊其實唔算多，好景個陣，一個實力有番咁上下嘅球員都唔夠錢買啦！再者，曉士心頭高，仲想簽埋熱刺中場派拿、富咸前鋒森莫亞，再加多個後衞㖭！2,500萬鎊，容乜易使晒吖！

力爭施斯返英打護級

話時話，施斯喺球場打滾多年，原來都只不過係30歲。英超球迷對佢最熟悉嘅，一定係佢效力利物浦其間，幫紅軍捧走歐聯，以及勇戰斷腳一幕；呢位法國前鋒好有領隊緣，好似前新特蘭領隊布魯士亦對佢念念不忘，喺布魯士俾「黑貓」炒魷前一刻，都仲掛住再向呢名黑人前鋒招手。
QPR家喺英超中下游掙扎，如果成功獲得施斯來投，而佢又有番以前嘅水準，相信唔多唔少都可以幫到呢支倫敦球隊爭取護級嘅。