今年六四集會除遭到政府史無前例以「限聚令」為藉口禁止，立法會當日料亦表決極具爭議的《國歌法》，多名民主派議員表明，當日會先留守議事廳力擋惡法，再趕快到維園和落區點起悼念六四的燭光。身兼支聯會常委的尹兆堅表明，將與該會常委進入維園，「你（中共）唔鍾意維園嗰數十萬燭光嘅話，我哋話畀你聽，全香港數百萬嘅燭光，係會還返畀你嘅！令佢更加係不能面對」。

記者 林俊謙

身兼支聯會常委的民主黨議員尹兆堅接受《蘋果》訪問時指，周四將先留守會議廳反對《國歌法》，並在投票結束後立即趕到維園悼念六四。他指，其他常委會以8人一組方式進入維園，即使預料會遭警方阻撓，仍希望能在維園燃起燭光，「我哋係唔會退卻嘅，我哋常委係會堅持進入維園」。

面對「港版國安法」打壓在即，他認為，香港人更加要與中共極權政府「對着幹」：「你（中共）越係唔畀我哋合法彰顯我哋嘅公民權利，我哋越要堅持到底，一定要入到維園，喺我全香港每一個地方都點起燭光。」

對於今年或因悼念六四被捕，尹認為面對政府極端打壓，選擇留在香港的人已無所畏懼，「而家喺咁嘅環境中，大家就挺起胸膛、挺直腰板撐到底，支持我哋嘅信念、理念，向極權說不，無論我哋用乜嘢方法抵抗都好，我哋都要展示一個不服從嘅姿態」。

自中五起從未缺席過維園六四集會的民主黨許智峯指，由於今年六四遇上立法會審議《國歌法》，他會先留守立法會進行議會抗爭，「如果我屆時已經俾人趕走咗，我可能會早啲落去（維園）囉！如果未被人趕走，我哋都會奮戰到最後一刻，都會喺議會」。他相信，不少香港人仍會自發到維園悼念六四，屆時或會與警方出現衝突，「我都係想去維園睇住，希望唔會有呢種嘅衝突，亦都唔想畀警方濫權」。

他相信不少香港人會在其他地方自發悼念，呼籲巿民屆時「be water」，「我諗今年未必好似以往咁，有一張維園幾十萬人嘅靚相，但我好有信心，巿民唔會忘記，嗰張相影唔到，但喺我哋心入面嗰支燭光一定會比以往多」。他指，由於六四遊行和集會今年都被禁，所以他早前特別在網上自彈自唱《自由花》一曲，「我希望可以用歌聲感染其他人，令其他人都唔好忘記（六四事件）」。

一直關心內地人權情況的公民黨議員郭家麒稱，民主派必須在明天和後天會上積極發言，才能阻止《國歌法》如建制派所願盡快通過，表明將就民主派提出的修訂積極發言，反對《國歌法》罰則過重。他指當晚會後若時間許可，會落區響應支聯會「遍地開花」的呼籲，若時間不許可，「分分鐘喺立法會門口，就會點起六四燭光」。

郭家麒認為，港人堅持燃起六四燭光十分重要，「全世界淨係得香港一個地方，係數以十萬計嘅人追悼同紀念六四呢場大屠殺，香港呢個堅持係畀全世界見到，我哋對一啲真實嘅歷史，係唔會放棄，因為極權嘅政權最希望就係人民忘記歷史」。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
【六四31】 專頁
毋忘初心 悼念英魂
結束一黨專政
-----------------------------
《囚牢之疆》 專頁
揭開集中營邪惡面紗
獲2020年人權新聞獎「多媒體（中文）」大獎
-----------------------------
App內1-Click訂閱《蘋果動新聞》
按此了解更多