張繼聰噚日捲入老闆蕭定一同大台之間嘅追數問題，明明上緊位都遭大台封殺，佢同日就喺ig拍片，話暫時唔會喺大台出現，至於o依家播緊、佢有份演嘅台慶劇《誇世代》，就會以自己方法宣傳。（新聞連結： http://bit.ly/2B7cQn3 ）

事件過咗一晚，陳豪、李佳芯、歐陽震華等《誇世代》演員今日就去到秀茂坪一間學校宣傳，張繼聰當然缺席今日活動。

講到張繼聰冇到，陳豪都話少咗張繼聰好失色：「係失望同遺憾，唔係佢控制到嘅事，其實我哋都唔知發生咩事。」陳豪又讚張繼聰：「阿聰係一個好演員，叫佢去邊宣傳，佢都好樂意，但暫時身不由已，希望誤會早啲化解。」

陳豪又讚張繼聰樂觀正面：「佢係一個positive嘅人，唔會為咗啲唔開心嘅事令佢心情低落，佢係非常之正面嘅人。」

對於六嬸昨午安詳離世，陳豪表示惋惜：「方姐對我哋嚟講係好人，私底下認識佢，有次同Aimee（陳茵媺）生日行街，撞到方姐，佢講咗句生日快樂，我哋兩個就去食飯。之後方姐靜靜雞拎份禮物上嚟，親手送俾Aimee，我哋非常感動。」

更多娛聞，喺晒《娛果》
http://fb.com/appledailyent