無綫被譽為CCTVB後,再有染紅消息。《南華早報》噚日頭版報道,上海市委副秘書長、辦公廳主任黎瑞剛將入TVB做高層。內地新浪傳媒致電黎瑞剛求證,黎透過短信回覆:「謠言,謝謝關心。」八方問過TVB,發言人話報道錯誤,目前無計劃改變管理層架構或開設新職位。
黎瑞剛係內地傳媒紅人,曾任上海東方傳媒集團(SMG)總裁。傳出黎瑞剛入TVB消息,其中一個原因可能係因為年前TVB斟賣盤時,SMG係呼聲最高買家之一。老友同八方講,《南早》老總係政協,對再有黨官掌管香港傳媒應該深慶得人,難怪新聞對黎瑞剛有讚無彈。