《歡樂滿東華》今日凌晨圓滿結束，結果籌得121,888,888萬善款，比往年多出300萬，其中籌得善款最多項目係徐小鳳嘅「東華友請小鳳姐」，佢唱《風雨同路》籌得450萬。

陳曉東(東東)噚晚有份做《東華》，記者問佢有冇留意舊愛張栢芝被傳秘密生咗第三胎嘅新聞，東東話：「佢冇講我知，如果係真會祝福佢，佢都冇認，我哋都唔應該講，都係問番當事人啦！」東東話自己正籌備出年3月舉行嘅演唱會，因為自己同東華主席王賢誌細細個就認識，所以特登嚟支持老友。

60歲嘅楊盼盼已經多年冇喺電視表演高難度動作，月前佢拍戲燒傷，但噚晚都有喺《東華》表演繩上轉圈高難度動作籌款，盼盼姐接受傳媒訪問時，話總理想佢演出，但知佢就快要開刀，都擔心佢有事，不過盼盼姐最後選擇博一博，因為好想挑戰自己。問之前燒傷對演出會唔會有影響？佢話已經好番：「醫生亦覺得我康復得好快，本應要100日康復，我只花咗50日，今次係燒傷後首次做高難度動作，大家都擔心我燒傷隻手有問題，但我話OK，筋絡冇問題。」

東華主席王賢誌今年碌盡人情咭請馮寶寶、謝賢、狄波拉、林子祥、徐小鳳、楊千嬅、莫文蔚等大卡士演出，又搵咗曾志偉同無綫破冰做司儀，喺今日凌晨2點半《東華》尾聲時，王賢誌致詞，話自己對《東華》有好大情意結:「由我細細個睇《東華》，到我加入TVB成為好多屆《東華》外景司儀，再做廠嘅司儀，到自己入咗東華董事局，由總理、副主席做起，個感覺好特別，雖然身份不斷咁變緊，但我都同《東華》好有關係，我知今年要負責呢個騷時，已經由年頭費煞思量，既然同我咁有淵源，咁有情意結，我都想個騷比以前更加好睇更加成功。有份演出嘅歌手、artist朋友，大家都知我煩咗佢哋好多好多。好開心多謝咁多朋友出力支持。」

精選娛聞，喺晒《娛果》
http://fb.com/appledailyent