當年今日
關於我們

陳錦鴻頂上
馮仁昭四圍超:陳啟泰拒做樣衰詩人

蘋果日報 2002/01/04 00:00


視高薪挖角搵咗陳寶華做戲劇總監,最近佢就準備喺呢個月開一套二十集嘅古裝劇,題材係描述中國唐朝大詩人李商隱。
馮仁昭收到風,陳寶華原想搵因主持《百萬富翁》而人氣急升嘅陳啟泰扮李商隱,但結果搵咗陳錦鴻代替。陳啟泰噚日就話:「之前我聽過公司話有呢個劇,但重未落實係唔係搵我,當時我重忙緊主持《百萬富翁》,兩項工作相叠會應接不暇。而且自問個樣唔適合拍古裝,我唔戴眼鏡好樣衰。」

下周試造型
至於陳錦鴻噚日喺電話度話:「我𠵱家淨係睇咗兩集劇本,公司通知要下個禮拜先試造型,好多詳情重未知。」問陳錦鴻知唔知呢個角色原屬意陳啟泰,佢只係執二攤,陳錦鴻話:「冇所謂,有啲嘢講乜都得,簽咗約先算落實,我覺得就算搵陳啟泰做都可以試吓。」

鄭伊健三折片酬變女人
王晶同文雋搞嘅電影《當男人變成女人》,係為吳志雄籌錢還債。原本佢哋想叫啲藝人幫手唔收錢拍呢套戲,但志雄哥就覺得咁樣唔係幾好,錢要畀,不過畀少啲啫。好似古天樂、舒淇同楊恭如只係開一日工,所以畀封利是,而其他佔戲較多嘅主角好似鄭伊健、王敏德、張達明同埋黃卓玲收嘅片酬都低至三、四折,大家咁做都係為咗幫志雄哥,證明娛樂圈其實都好有人情味。

姚嘉妮情挑鍾兆康
姚嘉妮噚日去旺角釣蝦場為新戲《狂野臥底》出席開鏡儀式,佢喺片中做一個記者,為追查殺手混入黑社會而結識鍾兆康,而且重會挑逗佢。問到姚嘉妮挑逗鍾兆康嘅戲分會唔會好大膽,佢話:「冇乜嘢㗎,我只係用眼神電佢已經令到佢發晒癲,佢喺戲度係個比較天真嘅蠱惑仔。」
《少林足球》四月美國上映
周星馳部《少林足球》喺香港有幾勁就係人都知,但估唔到星爺勁到將呢部戲帶埋去荷李活。馮仁昭聽聞《少林足球》今年四月就會正式喺美國上映,至於部戲會唔會搵人配音,就好似重拉鋸緊,星爺就梗係希望可以原裝版本上映,好似《臥虎藏龍》一樣咁威,而《少》片亦會於五月喺日本同韓國上映。

廖碧兒生日同爸爸慶祝
廖碧兒噚日喺電視城參加「一月星辰」活動,廖碧兒話今年會喺香港過生日,問到佢緋聞男友劉愷威會唔會同佢慶祝,廖碧兒話:「我諗唔會,佢都唔知我幾時生日,我重計劃咗今年生日同爸爸食飯慶祝。」

王家衞食飯除眼鏡
王家衞每次見記者嘅造型都係戴黑超或者粗框眼鏡,但呢排佢喺上海拍《天下無雙》,罕有地畀現場記者見到佢唔戴眼鏡個樣。事緣佢同個工作人員食飯,唔覺意除咗副眼鏡,不過馮仁昭就覺得,佢個樣都係戴咗眼鏡有神秘感啲。

封小平力撐「八條」
有報道話亞視有員工背唔到「員工八條」而被口頭警告,封小平噚日喺亞視對此回應話:「每間公司有每間公司嘅文化,呢八條只不過係將公司嘅利弊歸納一齊。」而新遊戲節目《各出其謀》被英國方面投訴,封小平就話:「呢啲係好事!我哋覺得有爆煲顯示會好睇啲,𠵱家都重做緊調查,到時我哋會以數據去支持咁做。」