【名導涉性侵】鈕承澤喜加床戲「自肥」 劇組設年青貌美小天使制度
張鈞甯舒淇鈕承澤性侵
現年52歲人稱「豆導」嘅台灣導演鈕承澤被指控性侵新片《跑馬》嘅女工作人員,喺台灣引起軒然大波。噚日佢去咗台北地檢應訊近3個鐘,先是話對受害人有好感,跟住又辯稱對方係自願留下,其後以飲大咗斷片為由,唔記得同受害人發生關係嘅細節,最後以150萬元新台幣(約38萬港元)擔保外出。不過有台灣律師表示鈕承澤先前私訊受害人所留嘅「對不起」,極可能成為佢入罪嘅關鍵。
豆導出事後,有關佢嘅「黑材料」越揭越多。曾參與電影《軍中樂園》嘅工作人員爆料,劇組有一套「小天使制度」,係以前其他劇組沒有。劇組要安排一名女生專門坐喺導演鈕承澤旁邊,幫佢控制螢幕、倒酒,仲要不時安撫佢隨時爆發嘅情緒。該名工作人員話一般劇組螢幕錄影同重播,都係由場記控制,不過鈕承澤就要「小天使」負責,拍攝才能順利進行。
據知,鈕承澤要求身材唔差嘅女工作人員做「小天使」:「總之這個職位是我們一進劇組,就一直聽到前輩說要找的,雖然不知道是不是只要是豆導的劇組就一定要有這個職位,但很明顯,就是高層們都覺得這個職位有其存在的必要,而且一定要是女生。在拍《軍》片時換過小天使,最後責任落在原本當陳建斌助理嘅女生上。」
其實之前已有人爆料指喺07年拍《情非得已之生存之道》時,粉墨登場嘅豆導同柯奐如拍咗一場床戲。當時柯奐如到拍攝現場後,才知要為「藝術犧牲」全裸上陣,床戲前後拍咗5個鐘,令柯奐如事後留下陰影。同年豆導執導電視劇《我在墾丁天氣晴》,安排自己演張鈞甯一夜情情人,仲親身示範親吻對方條頸,嚇咗張鈞甯一跳。更有傳喺拍電影《愛 Love》時,豆導為自己加插一場同舒淇嘅床戲,不過舒淇以「冇必要」為由拒絕咗。
精選娛聞,喺晒《娛果》
http://fb.com/appledailyent
鈕承澤早年同舒淇合作拍《愛 Love》。(資料圖片)