求驗客手記:文帥做嘢 「殺人王」隨時空降英超 - 求驗客
所謂一朝天子一朝臣,文仙尼落實執教曼城後,全世界都揣測緊佢會買咩人、賣咩人。英國《鏡報》言之鑿鑿話仍會率先向兩個英格蘭仔布歷治同埋尼史葛開刀,而由祖雲達斯挖走25歲嘅基亞連尼,實行一個頂兩個咁話喎。假如呢位意大利新一代「殺人王」真係空降英超,早排喺國際賽俾佢踢傷嘅尹佩斯肯定驚餐死。
文仙尼喺噚日見傳媒,據《鏡報》講,佢未上台已有張水蛇春咁長嘅買賣清單,其中佢對未達水準、近期都受膝傷困擾嘅中堅尼史葛、左閘布歷治最睇唔順眼,會盡早沽出;有出自然有入,據講佢已鎖定作替補,事關後者踢法硬朗、頭槌又好,肯定適合踢英超;最重要係雖然佢家陣喺「老婦人」踢中堅,但當年踢費倫天拿時踢過左中場、左閘,完全可以頂替到尼史葛同布歷治嘅位置。
祖雲達斯最近戰績下滑,前日衰到主場對榜尾隊卡坦尼亞都輸得,好大程度同基亞連尼養傷有關;佢就快好番,既然隊波近態唔似可以同國米爭霸,話唔定抵受唔住利誘,轉去英超闖天下噃。呢位仁兄喺上月意大利和荷蘭場友賽,以一記兇狠攔截搞到尹佩斯要入廠大修,名副其實係粗野王馬特拉斯嘅接班人,真係唔踢得,都嚇得。
查實另有消息指文仙尼想將當年喺國米一手提攜嘅巴洛迪利帶到英超,搞到國米班主莫拉堤即時回應話唔使旨意,睇嚟挖角潮唔係流o架。
文仙尼除咗要忙於買賣球員,仲要處理陣內主力球員嘅關係,好似巴西球星羅賓奴已經開腔話想盡快同佢傾吓偈,傾佢自己同隊波前程喎。文帥教曼城嘅成敗,某程度都真係要取決佢治唔治得住呢個不嬲操行麻麻嘅球員。