當年今日

90日成名之旅Tiffany一個BraTop免失業

蘋果日報 2002/01/15 00:00


這是一個九十日成名之旅!
三個月前,Tiffany的標致面孔與惹火身材給《壹本便利》看中,上封面,大字標題「百利Sales齋戴Bra開工」,翌日還上了港聞版,自此知名度大增:百利多了大群為昅嘢而來的麻甩仔、成為各報章雜誌ImageGirl、《Penthouse》封面女郎、兩部戲在手……
原本在Disco跳跳舞、拍拍照、沒有正職的她靠脫出位,但脫得聰明也有點運,得傳媒助她一臂之力,羨慕死不少發明星夢的女孩。
記者:陳漢榮 攝影:龍宇略
Tiffany小檔案
姓名:張碧珊
年齡:21
三圍:33D-22.5-34
身高:5呎4吋
演出經驗:《壹本便利》、《飲食男女》、《有線電視》等雜誌ImageGirl;《豬扒大聯盟》、《絕世好Bra》、《情迷大話王》、《一蚊雞保鑣》等電影特約演員,現拍《性Salon狂想曲》,另有一戲洽談中。
Bra與BraTop
義務人肉衣架
先簡介Tiffany的入行過程。她透過一好友而認識了現在的經理人,經理人搞FashionDesign,在百利開了間舖,經常安排旗下的青春美少女行Catwalk,Tiffany埋了堆,也不愁沒有見報機會。
「嗰日,《便利》記者落百利話要搵靚女Sales影相,搵着我,無所謂啦!不過先此聲明,嗰日我係就係着BraTop,不過外面重笠住件外套,記者要求我齋戴BraTop影相,話咁影會靚啲、Sexy啲、出嚟嘅效果好啲,我同意照做,我都明嘅,着到密密實實邊有睇頭?
「但有幾樣嘢我想講清楚,第一,我只不過算半個Sales,嗰日咁啱落舖頭幫手,順便搵經理人傾吓偈,先畀個記者撞到,我義務性質幫經理人做人肉衣架,撐吓場Sell吓客,就係咁多;第二,我諗住係做類似『至索Sales全面睇』咁上下嘅題目,點知最尾會寫成『逆市突圍,百利Sales齋戴Bra開工』,係就係誇張咗啲,不過都講得啱嘅,咁我嗰日真係着BraTopSell客嘛;第三,我着嘅係BraTop,唔係Bra,條封面大題好明顯誇張咗,Bra同BraTop,差好遠啫。」
近距離 唔畀昅
是否和雜誌夾計影相博出位?「唔好咁講,一切都係順住個勢走啫,講真,我唔係一個好發明星夢嘅女仔,我不嬲抱住玩玩吓嘅心態做Model,貪得意幫雜誌影吓相賺吓外快,但入娛樂圈嘅機會擺喺眼前,無理由唔試吓。」
說到機會,還要多得那篇港聞報道:「估唔到自己會上港聞版,老實講咁嘅嘢都值得報道?我覺得有啲搞笑囉!」搞笑還搞笑,報紙的宣傳力量遠比雜誌強得多,Tiffany一見報,瞬即成為城中話題,不少麻甩仔蜂擁而至,把百利擠個水洩不通。「好多男仔落百利,經過舖頭都係為咗昅我,含蓄嘅,企喺舖出面,指指點點細聲講大聲笑;大膽嘅,入嚟扮試衫,近距離昅,初初我都會着BraTop幫手Sell客,後尾見啲人都無心買嘢嘅,睬佢哋都儍,有理無理着番件外套,無謂俾人睇蝕,最後,直頭索性唔落舖頭打躉。」
除與不除
成人雜誌 三點不露
根據Tiffany「順勢而走」的理論,她又「順理成章」地當上了成人雜誌《Penthouse》的封面女郎。「經理人瓣瓣掂,識好多記者朋友,《Penthouse》話有興趣搵我做CoverGirl,我諗咁多明星都拍過《Penthouse》,話晒都係高檔成人雜誌,可以提高知名度,無所謂啦!」
這輯三點不露的寫真拍得很有美感,沒有擘髀夾胸的猥瑣動作,完全符合Tiffany的要求:「好靚呀!我得五呎四吋,但可以影到我有雙修長美腿,應大得大應細得細……至少我問過朋友意見,佢哋都話我唔會因為影完呢輯相而俾人定位做三級女郎,咁樣係最理想嘅,上完封面多咗人識,但一啲都唔覺得Cheap。」
在陌生人面前赤身露體可有尷尬?「一啲都無,一來攝影師好專業,工作認真,好快就影完;二來我本身係Dancer,經常要着到好Sexy咁跳舞,對自己身材有信心,無乜嘢好驚。我知全世界嘅焦點都放喺我個胸度,但其實我最滿意自己條腰,夠幼,着乜衫都咁好睇。」
目標徐若瑄
Tiffany說入不入娛樂圈,一切隨緣,能否名成利就,也隨緣。但所謂的隨緣,只是「隨」人為的「緣」,打後的路,一切盡在經理人的掌握中,而Tiffany很明顯對他百分百信任。
「無錯!我好信我經理人,例如做性感WebJ可以短時間出位,佢唔同意,佢話呢行唔適合我,要捱更抵夜,收入又少,佢識得好多傳媒,要增加見報率話都無咁易。我點解拍《Penthouse》?因為佢話呢本係國際性雜誌,好多地方都睇得到,做CoverGirl可以增加外地知名度,𠵱家搭緊路,希望可以喺日本或者台灣出寫真集,我嘅目標係徐若瑄、BiBi,健康性感嘅化身。」
Tiffany脫得很聰明,三點不露,她不想太早給人定型:「只要有條件,個個女仔都可以露三點,問題係值唔值,𠵱家我只求知名度,行性感已經OK!」
特別介紹
太遙遠的暫且不說,刻下Tiffany又有何工作?「上港聞之後,群星電影公司嘅馬學明主動搵我Casting,套戲叫《性Salon狂想曲》,笑片一套,我角色係個Lesbian!之前都做過特約演員,無對白,今次終於真真正正可以拍十幾組戲,有對白有得發揮,最重要嘅係套戲會落番我個名,情況我估就好似小雪初出道咁,畀番個『特別介紹』嘅銜頭我,呢個絕對係機會,我一定會珍惜。嚟緊落實重有一套戲,片名未定,做乜角色都未知,但有得拍戲我已經好興奮。」

「呢九十日,好似發咗場夢咁,三個月前我重失緊業,今日就好多機會我去爭取,真係估唔到……」