【新增圖片】
日本組合w-inds.昨晚假九龍灣國際展貿中心Starhall舉行演唱會《w-inds. LIVE TOUR 2018 “100” IN HONG KONG》 ，係三位成員千葉涼平、橘慶太、緒方龍一第十度襲港開騷，演唱會全場爆滿。w-inds.於8:15分出場，以《Bring back the summer》打頭陣，全場歌迷已勁high企起身，齊齊揮動藍色螢光棒，三子又跳又唱演澤《In Love With The Music》、《Show You Tonight》等作品，又高呼「Thank you Hong Kong.」

全晚w-inds.狂晒廣東話講:「大家好」，龍一話:「好開心」，涼平就話「肚餓」、「勁肚餓」，慶太打招呼講:「香港嘅朋友，大家好，我係慶太。」跟住叫全場跟住講「慶太」。後來當唱《Do Your Actions》時，涼平負責彈琴，龍一彈結他，到演繹《The Right Thing》就由涼平同龍一唱，慶太負責彈琴。

今次係w-inds.相隔一年再來港開騷，成員話:「好開心可以再來港，今次已經係第10次香港演唱會，好多謝大家。」然後佢哋用廣東話講:「多謝」涼平又無厘頭狂講「好肚餓」，龍一就話:「你已經食咗好多小籠包。」w-inds.三子話：「好耐冇見，大家好嗎？」佢哋指完成日本巡演三個月再嚟到香港表演，亦應該係今年最後嘅騷，能夠來到香港見到大家好開心。隨後佢哋唱出舊作《Long Road》、《SUPER LOVER ～I need you tonight～》等，再度炒熱氣氛。慶太指龍一為港騷練咗唔少廣東話，龍一又高呼「大家開唔開心」、「正」。

來到安哥環節，慶太用手機反拍粉絲，粉絲就齊齊高舉寫住「w-inds.&香港 無法取代的十年以及永遠」字句，w-inds.即用廣東話講「多謝」，並約定粉絲明年再見。涼平於上月中剛過生日，而慶太同龍一就分別於本月16日、17日生日，最後全場粉絲大合唱生日歌為佢哋慶祝。此外，三子今次來港更獲贊助商送上陀飛輪腕錶，仲同品牌代表拍照留念。

精選娛聞，喺晒《娛果》
http://fb.com/appledailyent