方力申今日喺西貢碼頭出席「關懷海洋日」，佢話過去都曾參與過保護珊瑚礁活動，而且香港上年被颱風天鴿吹襲，今年又有颱風山竹，令遍佈海上嘅垃圾都吹咗上岸：「兩個風吹咗好多垃圾上嚟，人類真係製造咗好多垃圾，發泡膠同鋁罐可能幾百年都唔會分解，地球超過一半係海，應該好好保護，魚食垃圾，人食魚，其實對自己都唔好。」

小方透露山竹襲港期間，新屋正在裝修：「人哋話打風係考驗裝修師傅功力，結果係合格嘅，證明慢工出細貨，已經裝修咗一年，希望農曆新年前可以入伙。」

嚟緊中秋，因爸爸媽媽去北京探親戚，所以小方會去朋友屋企BBQ，仲表示會趁機放中秋假期：「到時唔會教游水，做節就休息吓。」問到教小朋友游水攰嗎？佢笑言：「梗係攰啦，聲都冇呀，浸水已經消耗好多體力，又要講好多嘢，好嘥氣。」

精選娛聞，喺晒《娛果》
http://fb.com/appledailyent