由韓國男星朴敘俊、姜河那主演嘅韓片《青年警察》，噚日喺香港開畫，電影早於上月9號已喺韓國上映，反映仲好好，截至前日累計觀影人次已逾500萬人次，成績飲得杯落。

日前姜河那已親自來港為電影宣傳，雖然朴敘俊因工作關係就未能配合來港宣傳，但本身朴敘俊就會於本月30號來港舉行首個粉絲見面會。

而來港前，朴敘俊喺韓國就接受本報訪問。對於喺片中有唔少動作場面，朴敘俊直認當中有95%都冇用替身，自己親身上陣演出，佢話：「我覺得用太多替身會失去真實感，而親身拍攝嘅效果會更好，所以喺呢方面我都會想做得更好，慶幸大家都冇受嚴重嘅傷，順利完成拍攝。」

朴敘俊出名有副好body，之前佢喺韓劇《三流之路》中都不時騷肌，而今次喺電影中佢亦繼續大方晒肌，佢透露本身有做舉重訓練成8年之多，由於喺片中佢飾演嘅基俊係一名剛入警察學校訓練嘅初哥，所以朴敘俊就唔想有太多肌肉，令佢自己睇起來就好似運動選手一樣，佢話：「拍攝剛入警察學校嘅部份時就要先減重同埋減少肌肉，之後發現只要每周一次運動，會令肌肉變大。」不過佢就唔覺自己肌肉係令佢最有自信嘅身體部位，反而覺得自己嘅眼睛最有魅力，無論係善定惡都能夠表現出來。

喺片中佢同姜河那都立心想成為警察，但現實生活中朴敘俊兒時夢想就係成為棒球選手，雖然冇諗過做警察，但能夠通過今次拍攝體驗一下做警察，感覺都好好。而喺片中佢哋要喺冬天進行拍攝，當中因為天氣太凍，令到身體變得好僵硬，過程中亦很疲累。

朴敘俊同姜河那喺片中嘅一段「兄弟情」十分有趣，對於拍檔嘅感覺，朴敘俊話：「從姜河那嘅一言一行都能夠睇得出佢係一個善良正直嘅青年，佢成日掛住笑容，畀身邊嘅人感覺好正面同積極嘅能量。托佢嘅福，我哋整個拍攝時都好舒服，很令人享受。雖然佢嘅年紀比我小，但我從佢身上學到很多嘢。」