大除夕最好節目梗係行年宵，八方噚日走勻唔同政黨攤檔，睇吓有乜精選筍嘢買，辦吓年貨。
最多別致嘢賣嘅攤檔相信非社民連莫屬，佢哋嘅鎮檔之寶「你呃人」咕𠱸，同埋哲古華拉頸巾都好受歡迎。社記副主席吳文遠話，佢哋錯判形勢，兩件貨都入少咗，供不應求，一於坐地起價，咕𠱸由120蚊加到150蚊，頸巾就由80蚊加到100蚊，佢話現貨唔多，要買趁手。
年宵去到尾聲通常係劈價促銷，社記唔憂賣，難怪可以加價。又查實社記呢排官司纏身，之前長毛就梁振英僭建問題，提出選舉呈請及司法覆核敗訴，要支付逾百萬訟費，隨時破產。
所以社記年宵賣得多啲，籌錢多啲，咁先可以幫長毛同狼英政府打持久戰。

至於今年好有諗頭嘅民主黨同公民黨亦生意唔錯。民主黨嘅「鬥快下台魚蝦蟹」，成功吸引後生仔幫襯，短短幾日就賣咗近600盒；公民黨「人人落力踩CY」拖鞋同埋iPad袋亦暢銷。
就連工黨嘅九龍皇帝曾灶財御筆Tee都熱賣，黑色版細碼、中碼斷貨，只係剩番白色版。支聯會今年要捱貴租，佢哋隻《民主會戰勝歸來》CD好好賣，亦得到好多熱心市民捐錢，支持佢哋設永久六四紀念館，相信年宵可以籌到六位數字。

民主派賣乜都掂，反觀民建聯就比較黯然。佢哋個福袋，有瓜子、餅乾、利是封、冬菇，連工包料50蚊都唔得啦，但一減再減，減到20蚊都滯銷，香港人好實際，票投民建聯，鈔票就無謂益佢哋嘞。
其實民主派大賣真係多謝狼英，年宵銷情反映社會現況，試問唔係呢位689一波未停、一波又起嘅衰嘢，呢類政治味濃嘅精品又點會賣到滿堂紅呀！
mailto:[email protected]