張紋嘉（Crystal）同張惠雅（Regen）兩位好姊妹今日一齊擔任尖沙嘴一個除夕派對嘉賓，同場仲有AsOne，講到新年願望，Crystal就希望新一年可以做到想做嘅嘢，置業當然係最大目標，Regen就希望工作順利，講到感情方面，佢哋就笑晒口，Crystal話要睇上天。

面對香港租金昂貴，Regen透露早已搬回家跟家人同住節省開支，佢指慳到出嚟嘅錢夠佢每個月去一次旅行，本身係旅遊達人嘅佢，最專長係搵平機票，繼之前寫咗一本澳洲旅遊書後，佢計劃寫一本亞洲地區嘅書，心目中想寫尼泊爾，但若果要去要搵多位朋友幫手影相。

仍然係租樓一族嘅Crytal話：「我都成日被家人話點解仲租樓住，所以半年前我同一位大學同學夾份租樓，雖然都有點唔習慣，因為我平時鍾意喺屋企hea，但佢就好勤力執屋，令我都要搵啲嘢執下。」由於同屋主任職空姐，Crystal笑指平時都係似獨居一樣。