舊年係地產代理行最賺錢嘅一年，再破09年高峯時嘅紀錄，收佣收到手軟。食佣維生嘅前線代理當然笑到見牙唔見眼，後勤食老底嘅員工，亦唔使心噏，皆因公司都唔會刻薄佢哋。總結全年業績之後，兩大代理噚日齊齊鬥豪，宣佈再派花紅，美聯最多派7個月花紅，中原就最多有20個月，真係恨死唔少打工仔。
中原地產亞太區董事總經理陳永傑話，因為港澳兩地舊年營業額有成32.4億，係歷來嘅新高，為咗貫徹公司分享成果嘅管理理念，除咗舊年頭三季已經向全體後勤員工派咗超過4.7個月嘅花紅之外，家再派最少1.4個月嘅花紅，即係全年計，老底連花紅，員工最少都攞咗超過18個月糧；主任級就有21個月；至於最高獎償嘅更加有成32個月。花紅係集團歷來派得最多嘅一年。

中原後勤平均加薪5%

美聯集團（1200）同美聯工商舖（459）亦都宣佈，會因應舊年理想業績，再派花紅畀後勤員工，令全年所派嘅花紅最多達到7個月，平均都有5個月。另外，香港置業就少啲，全年最高得3.5個月花紅，平均就有2.5個月。
中原仲話，今年後勤員工平均會加薪5%，美聯就未有講明，美聯嘅後勤想知道加幾多人工，睇嚟要問吓主席黃建業至得。