【隔牆對論】
【本報訊】中央於3月兩會期間就政改釋出強硬口風，個多月後又邀泛民到上海商討政改。激進民主派中，決意不訪滬的人民力量陳志全批評中央此舉是裝成「有商有量」態度，實際上矮化立法會，而既然明知是一個騙局，為何又要參與？反而社民連梁國雄一口答應，認為北京的策略是進行期望管理，奈何民主派未能反客為主，趁機表明會向中央道出三軌方案、公民提名不可或缺的底線，才令自身弱點暴露於中共眼前。
記者：呂浩然　姚國雄

記：《蘋果》記者　
梁：社民連立法會議員梁國雄「長毛」

記：
為甚麼要參與上海之行？
梁：
05年我都去過廣州與（時任廣東省省委書記、現任全國人大常委會委員長）張德江「駁嘴」。其實每一次京官來港，我都到場抗議，表達對六四、一黨專政的意見，只是很多時他們奸矛指我冇打呔而不准我進場。所以對我而言，見誰也一樣。無論是（基本法委員會主任）李飛或（國務院港澳辦主任）王光亞，他有少許良心都知道六四中是邊個啱，就算（國家主席）習近平見我，我也會這樣說。其他如劉曉波、政治犯、六四25周年的問題，今次去上海我也會表達。

記：
2010年泛民入中聯辦就政改談判就被指為「密室談判」，今次你到上海討論政改，是否也是「密室談判」？
梁：
嘥時間啦，香港冇人相信呢樣嘢，點會因為見一次面就密室談判？其實（2010年）那次民主黨密室談判，是因為他們真的做了一些事，是與他們以往的立場不同，是以往他們永遠都不應該做的，三日內轉軚，係將佢以前話要爭取普選個立場改咗，呢個先重要。所以最大問題是，泛民主派上去後，拿出（前政務司司長、香港2020召集人）陳方安生方案或者公民推薦方案給共產黨、求共產黨，這才是大鑊，呢個叫咩呢？呢個叫唾面自乾，自己吐口水整落自己塊面度。現在的問題是和平佔中以至泛民主派都有這危機，連公民提名都舉棋不定。
記：
那麼你與其他泛民議員一同去上海，各自的目的有分別嗎？你又認為泛民應怎樣做呢？
梁：
泛民有個問題，就係連公民提名不可或缺都搞唔掂，係咪一個底線呢？就算係佔中運動都在躊躇為何佔中，你自己不爭氣，人家當然可以侮辱你，唔係話你去唔去，𠵱家去，老實講人哋問你要乜嘢，成幾廿個方案。你話我希望佢哋（泛民）點樣呢就嘥時間嘅，根本佢哋都唔會聽我講。其實平等、有尊嚴，唔能夠見到共產黨就將自己嘅底線無限咁退，我最希望泛民主派能在訪滬前得到一個共識方案，即是真普聯的三軌方案，公民提名不可或缺。我覺得這次到上海的最重要意義是，暴露了泛民主派與和平佔中沒有一個最底線的方案，所以去與不去，最大教訓就係這個。

記：
對於3月兩會期間，建制派人士對政改問題口風極硬，隨後卻又邀請議員到上海討論政改。你認為這是甚麼態度、做法呢？
梁：
這次正是期望管理，北京向3月兩會期間有看新聞的市民表明，強硬是不行的，然後泛民的回應卻又「收到佢（北京）講咩」，不斷地修改自己的方案，由（公民黨）湯家驊、以至林林總總的方案都出台。故此中共的策略算是成功，因為作為港人，收到的訊息是就公民提名而言是共產黨冇得傾，而泛民即表示沒有公民提名也可，共產黨用上海之行嚟提醒你、嘲笑你，你都收唔到囉，最好嘅做法就係趁去上海前宣佈（泛民的共識方案）就最好，把3月期間輸掉的也扳回。佔中應該同泛民主派有立場書，認為三軌方案裏面公民提名不可或缺係我哋嘅立場，希望中共能夠聽到，如果再差過呢一點，我哋不排除舉行辭職公投和佔中，咁咪反客為主。

其實2010年6月中，當時民主黨的方案也被指為冇得傾，連（基本法委員會副主任）梁愛詩都表示不行。所以共產黨是非常之狡猾，我覺得泛民要明白，所謂三軌方案、公民提名不可或缺，其實已讓步，因為任由提名委員會提名候選人，嗰啲已經係捐狗窿出嚟喇，咁你冇理由人哋捐狗窿，我哋俾個狗窿反制自己嘛，其實普選不過是20多個字：人人有權依法推薦他人和自己參選及投票令人當選。

mailto:[email protected]