唔少議員經常批評副局長、政治助理人工過高卻表現麻麻，立法會議員噚日忍唔住透過口頭質詢開名鬧財經事務及庫務局副局長陳浩濂、女拔十優生政助楊寶蓮、「梁粉」發展局政治助理馮英倫，罪名包括從冇游說議員、拒為議員約見局長，有副局長甚至只顧自拍為樂。

三人遭開名狂轟

民主派同建制派噚日罕有聯手狠批一眾月薪高達20多萬嘅副局長、同埋月薪高達8至12萬元嘅政助。呢條口頭質詢原本由新民黨葉劉淑儀提出，但因抱恙由黨友容海恩代問。容鬧部份副局長同政助不稱職：「財經事務及庫務局，佢哋喺2017年10月至今有18條條例草案，應該嚟立法會同議員游說，但係葉太同埋我，都未接過任何副局或者政治助理嘅電話、短訊，亦都未同我哋講過關於政府政策、游說或者公共開支嘅建議」，大鬧佢哋冇做好份工！

工聯會麥美娟唔開名鬧爆一名副局長，話呢個副局出席各個典禮經常自拍，但就冇就政策同業界溝通。公民黨譚文豪就直接鬧馮英倫，話自己曾就觀塘一幅用地改變土地用途聯絡馮，但馮態度惡劣，不單拒絕幫佢約見局長，仲話議員唔係持份者。聶德權話唔不方便評論個別個案，仲推個波畀常秘，話可能由常秘負責聯絡議員，各司其職啫。

李八方