新地（016）大股東郭炳江7月時就貪污案獲准保釋外出提出上訴，當時佢講過，要學識踩單車，9月參加由新地贊助嘅單車賽事，事隔個幾月，唔知佢學成點呢？佢乖仔郭基煇（Adam）噚日好婉轉咁話，「得兩個月，要爸爸學識踩單車會有啲壓力」，咁即係未識踩，落唔到場喇。
其實大家都明白嘅，郭炳江今年64歲，要學踩單車的確唔易。雖然唔可以參加單車賽，但Adam就話，爸爸將會參加新地每年一度舉辦嘅「ICC公益垂直跑」。

郭基煇中秋食飯團圓

佢話，郭炳江一向有跑馬拉松，之前喺獄中亦會定期跑步同做運動，家陣身心都非常健康，一星期仲要上3日神學堂，「Schedule都非常滿」。呢個中秋節，Adam透露，會一家人一齊食餐飯，簡簡單單咁過已經好開心咁話。
講番由新地第2年贊助嘅香港單車節，會喺25號舉行，到時有超過5,000人參加。Adam噚日為此出席宣傳活動，見佢一身單車裝束，同5名隊友接力踩健身單車，踩到一身汗，相當落力。查實佢「車齡」只得一年左右，一踩就愛上，踩單車令佢明白到無論任何年紀、身份、部單車幾貴都好，最重要係一班人一齊踩，一齊付出，就已經好值得。

李華華
mailto:[email protected]