根據法例，私家車車齡滿六年便要年年驗車，近年就多了車主不經車房檢修、自行把車送到驗車中心，於中心當認可車輛測試員謝偉強（阿強）提醒大家要對自己的車輛有足夠信心才考慮，並向大家分享一點心得。

雖然不經車房驗車，可省卻經事前檢修的費用及時間，但有任何小毛病，都得多驗一次，多交$585驗車費，分分鐘弄巧反拙。阿強指出，二手車可能被改裝過，車主未必知道，首次自己送檢有風險，至於一手買入的車輛，車主要熟悉性能才值一博，加上沒有車房的設備，車主可做的其實不多，「一般車主只可以做啲比較表面嘅觀察，主要都係留意自己嘅車有冇貼咗違規玻璃紙，同埋用緊嘅車頭燈係咪同牌簿一樣。尤其二手車，買番嚟之前可能俾上手車主換咗啲嘢，現任車主未必留意到。當然，最好係要定期保養，咁就可以確保機件良好。」
至於廢氣排放量亦是另一個值得留意的地方，「因為無論車主抑或車房都未必有設備做測試，催化劑係會老化，要到驗車中心先check到。另外，底盤部份嘅底擔、杯士和塵冚，呢啲都要多加留意。」

自行送檢知多啲
1.檢查車頭燈是普通燈泡、LED或HID，確保與牌簿上的款式一致。
2.不應貼有透光不足的玻璃紙。
3.政府的廢氣排放量標準十分嚴格，是送檢一大難關，但車主無從檢測，所以平日最好多加保養。
4.記緊帶牌簿，以免白走一趟！

八方汽車　荃灣橫龍街78-84號正好工業大廈二樓

記者：梁立勤