日本男星齋藤工上年憑住《晝顏》一劇成為新師奶殺手，由於喺劇入面有露肉場面，佢仲自稱為男版壇蜜。齋藤工演出嘅新劇《醫生們的戀愛事情》即將喺下個月開播，為咗谷劇，齋藤工同名模比留川游就扮情侶，幫雜誌《anan》影咗輯以愛情為主題嘅新相。

齋藤工同比留川游擺好多唔同嘅親熱甫士，起初齋藤工喺梳化上面咀嘴，後來仲咀到上床，而佢仲要一直扮情深款款咁。雜誌中亦提到女性增加吸引力嘅化妝，但齋藤工話有時女性嘅素顏，都有一定吸引力。