日本女星神田UNO經常入圍最討厭女星，同佢愛晒命嘅性格絕對有關係。神田UNO喺2006年同實業家丈夫西村拓郎結婚後，經常展示闊太生活，日前佢又話因為囡囡參加完芭蕾舞活動，第二日就要去小提琴集訓課，只好出動老公心愛嘅直升機。

不過，日本有傳媒卻報道神田UNO近日同老公處於分居狀態。報道話，神田UNO早前帶囡囡參加芭蕾舞學校嘅活動，當日西村拓郎率先抵埗，神田UNO同屋企人之後先趕到，佢哋喺活動結束後一齊去咗一間中華料理用膳，不過食完飯冇一齊返屋企，神田UNO帶囡囡返咗去娘家。

有知情人士透露，神田UNO同丈夫以呢個模式已生活咗半年，處於分居狀態，囡囡都問幾時見到爸爸，但係神田UNO似乎仍然唔想畀人知佢婚姻破裂，仲喺人前營造幸福假象。