曾志偉、劉心悠今日喺尖沙咀出席奇華月餅新廣告發布會，兩人首次喺廣告上合作，活動中心悠分享拍攝時嘅趣事，佢話：「廣告內需要我彈古箏。」不過心悠廣東話唔正講咗「古精」，志偉喺隔離就話：「古精？古精真係好難彈㗎喎，點彈呀？」惹嚟全場大笑。

兩人訪問時，志偉就話自從12年前開始已經同心悠合作拍《阿嫂》，咁多年嚟對方個樣都係冇變過。問到兩人廣告內係咪飾演情侶？心悠話：「導演冇講，可能係畀啲幻想大家。」旁邊嘅志偉就話：「性…幻想呀。」 問到心悠鍾唔鍾意志偉呢一種男士？佢話：「都鍾意幽默嘅人，自己鍾意笑，而且外表唔係最重要。」志偉喺隔離就話：「疊水最重要。」

心悠入行多年一直鮮有緋聞，問到志偉有無介紹男仔俾佢識？志偉話：「好難㗎，佢都百毒不侵，而且我得兩種朋友，就係豬朋狗友 點介紹得落。」心悠直言有好友介紹男仔一齊食飯，但可能時候未到。志偉亦話心悠係好難得，咁多年從來都冇唔好嘅新聞，仲話：「都唔知佢係咪有病㗎，次次做完嘢就即刻返屋企。」

問到心悠中秋點過？志偉又插嘴：「佢中秋梗係難過啦。」而自己到時就應該有嘢做。心悠就話會同媽咪返台灣，帶埋月餅探親戚，仲話o依家先知道原來啲月餅係可以切開食。志偉就好抵死咁話：「你以前成個食㗎？仲要切開咁咪好多親戚要切片，如果係我啲親戚，同我脫離關係都似，切片喎。」搞到心悠尷尬傻笑。